In ein bómvol Café ’t Sjterfhoes zeen oppe zaoterdigaovend veur de Kènjeroptoch de lètste 33 nómmesj van de TOP111 2023 geprizzenteierd.
Wo Cas Frusch de sjpits aafbeet mit ein interview es DJ van Radio Nónnevot woorte dae zellefde aovend nog meer luuj veur de microfoon gehaold. Zo ware d’r ónger angere interviews mit Peet van Erp, Sjohn Smeets, Cyrille Nïel en mit ooze nuuje Vors Marot Joep I en Sjtadsprins Ruud II mer ouch de persiflaasj op Guido van Haen waar te heure.
Óngertössje woort d’r flink mit nónnevotte en meziek gesjtruid en gouf Tom Jessen aan de microfoon ouch nog de lètste polsbendjes veur ’t Kanón van ’t Balkón weg.
Terwiel gisteraovend zo’n 2.500 luuj nao Radio Nónnevot höbbe geloesterd en d’n tèller euver de gansen daag de 4.000 aantikde, kroop de sjpanning in ’t Sjterfhoes langzaamrandj op richting de Top 5.
De oeteindelikke wènner van de TOP111 is ein leidje dat veer de aafgeloupe’n tied dèkser höbbe geheurd in de Zittesje Revuu. “Oukouk” kreeg de meiste sjtömme van ’t volk van Zitterd. En d’r woort massaal gesjtömp de aafgeloupe daag. Mer leifs 1.500 sjtömme woorte oetgebrach.
Veer bedanke uch leif luuj veur ’t loestere nao Radio Nónnevot, veur ’t sjtömme en veur ’t mit kómme viere van de TOP111 2023! Wènt wie gisteraovend al door Vors Joep woort gezag Vastelaovend dat make & viere veer same!
Radio Nónnevot wunsj uch eine Zelige Vastelaovend en zal nog pès Essjelegounsdig te beloestere zeen.
De ganse oetsjlaag van de TOP111 2023 vèndj geer natuurlik in de nuuje Radio Nónnevot app!
